மாரடைப்பை குணப்படுத்தும் இஞ்சி!

“இதயத்துக்கு இரத்தத்தை கொண்டு செல்லும் குழாயில் அடைப்பு ஏற்படுவதைத் தடுக்கும் ஆற்றல் இஞ்சிக்கு உள்ளது. கொழுப்புச்சத்து உள்ள உணவை சாப்பிடும் பொழுது ஐந்து கிராம் அளவுக்கு இஞ்சியை சேர்த்துக்கொள்ள வேண்டும். கொழுப்பு சத்து நிறைந்துள்ள உணவை அடிக்கடி சாப்பிடுவது இரத்த நாள இயக்கத்தை நாளடைவில் வலுவிழக்கச் செய்துவிடும்.
இரத்தநாளங்களில் இரத்தக்கட்டு ஏதேனும் ஏற்படுமாயின் அதை சரிசெய்வது அவ்வளவு எளிதன்று. இதற்குக் கைகண்ட மருந்தாக இஞ்சி விளங்குகின்றது. இரத்த நாளங்களின் செயல்பாட்டை மேம்படுத்தி மாரடைப்பு நேராமல் இஞ்சி தடுக்கின்றது.” என்று இந்திய மருத்துவக் கழக இதழில் டாக்டர் SK வர்மா தெரிவித்துள்ளார்.
ஆரோக்கியமான 30 நபர்களிடம் இஞ்சியின் மருத்துவகுணத்தைக் குறித்து அறிய சோதனை நடத்தப்பட்டது. முதல் வாரத்தில் 50 கிராம் வெண்ணையும், 4 ரொட்டித்துண்டுகளும் அவர்களுக்குக் கொடுக்கபட்டன. அடுத்த வாரம் அதனுடன் ஐந்து கிராம் இஞ்சி சேர்த்து கொடுக்கப்பட்டது. அதற்கு அடுத்த வாரம் அவர்களின் இரத்தம் சோதிக்கப்பட்டது. அவர்களின் இரத்த நாளத்தின் முதல் வார இயக்கம் 18.8 சதவிகிதம் குறைந்து இருந்தது. ஆனால் அதற்கு அடுத்த வாரம் 6.7 சதவிகிதம் அதிகரித்து இருந்தது.
இதன் மூலம் இரத்தநாளங்களின் செயல்பாட்டிற்கும், இரத்த ஓட்டத்திற்கும் இஞ்சியின் பயன்பாடு தெளிவாக நிரூபிக்கப்பட்டது. மாரடைப்பு ஏற்படுவதற்கு, இரத்தநாளங்களில் ஏற்படும் அடைப்பும், அவற்றில் ஏற்படும் இரத்தக் கட்டும் மிக முக்கிய காரணம் ஆகும்.
கொழுப்புச் சத்து அதிகமாக உள்ள உணவுகளை அதிகம் பயன்படுத்துபவர்களுக்கு மாரடைப்பு ஏற்படுவதற்கான சாத்தியம் அதிகம். இதற்கு இரத்தநாளங்களின் சுவர்களில் கொழுப்பு படிந்து இரத்த நாளங்களை வலுவிழக்கச் செய்வதும், இரத்த ஓட்டத்தின் வேகத்தை அது பாதிப்பதும் காரணமாகும். மேற்கண்ட ஆய்வின் மூலம் இரத்தநாளங்களின் வலுவிற்கும், சரியான இரத்த ஓட்டத்திற்கும் இஞ்சி வெகுவாக உதவுகிறது என்பது நிரூபணமாகியுள்ளது.
இந்த இஞ்சியின் பலன்கள் இதோடு நின்றுவிடவில்லை. மேலும் பல நோய்களுக்கு அருமருந்தாக இது உள்ளது.
சளிப்பிடித்தல் / ஜலதோஷம் நோய்க்காரணியான வைரஸைத் தாக்கி அழிக்கிறது; தலைவலியைப் போக்குகிறது.
இரத்தஓட்டம் சீராக இருக்க உதவுகிறது; கொழுப்புச்சத்தைக் குறைக்கிறது; மைய நரம்பு மண்டலத்தைத் தூண்டி
இருதய, சுவாசத் தசைகள் சீராக இயங்க உதவுகிறது.
மலச்சிக்கல் ஏற்படுவதைத் தடுக்கிறது.
செரித்தலைச் சீராக்கி வயிற்றுவலி ஏற்படுவதைத் தடுக்கிறது.
மகளிரின் கருப்பைவலிக்கும் மாதவிலக்கு நேரங்களில் அடிவயிற்றில் உண்டாகும் வலிகளுக்கும் நன்மருந்தாக உள்ளது.
தோலில் உண்டாகும் உலர்சருமம், காயங்கள், சிரங்குகள் போன்றவற்றிக்கும் இது நல்ல மருந்தாகும்.
மூட்டுவலிக்கும் இது நன்மருந்தாக இருப்பதால் ஆஸ்பிரின் ஒவ்வாதவர்களுக்கு இது நல்லதொரு அருட்கொடையாகும்.
எனவே ஒவ்வொரு நாள் உணவிலும் இஞ்சியை சேர்த்துக்கொள்வது உடலுக்கு பாதுகாப்பானது என மருத்துவ ஆராச்சியாளர்கள் கூறுகின்றனர்.

காதலனுடன் இருந்த பெண்ணை பலாத்காரம் புரிய முனைந்த பொலிஸ்!

தர்மபுரி மாவட்டம் ஏ.பாப்பாரப்பட்டியை சேர்ந்தவர் முருகனின் மனைவி தனலட்சுமி. முருகன் இறந்து விட்டார். தனலட்சுமி நாதஸ்வர வித்வான். இவர் பெங்களூர் சென்று விட்டு மாலை 6-30 மணிக்கு தர்மபுரிக்கு வந்தார். தனலட்சுமியை உறவினர் வினோத்குமார் தர்மபுரி பஸ்நிலையத்தில் இருந்து மோட்டார் சைக்கிளில் அழைத்து சென்றார். அவர்கள் காட்டுப்பகுதியில் மதுகுடித்து விட்டு உல்லாசமாக இருந்தனர்.
அந்த நேரத்தில் மோட்டார் சைக்கிளில் 2 போலீசார் அங்கு வந்தனர். அவர்கள் கள்ளக்காதல் ஜோடியை பார்த்ததும் அவர்களிடம் தங்களை போலீசார் என்று அறிமுகம் செய்து மிரட்டினர். தனலட்சுமியை தங்களுடன் வருமாறு அழைத்தனர். இதற்கு வினோத்குமார் எதிர்ப்பு தெரிவித்தார். உடனே வினோத்குமாரை தாக்கினார்கள். பின்னர் போலீஸ்காரர்கள் இருவரும் தனலட்சுமியை கற்பழிக்க முயன்றனர். அந்த நேரத்தில் வினோத்குமார் தனக்கு தெரிந்த வக்கீல் ஒருவரிடம் இதுகுறித்து தெரிவித்தார். உடனே வக்கீல் சிலருடன் அந்த இடத்திற்கு வந்துள்ளார்.
அப்போது வக்கீலுக்கும், போலீசாருக்கும் வாக்குவாதம் ஏற்பட்டுள்ளது. அந்த நேரத்தில் தனலட்சுமி தப்பி ஓடினார். அப்போது அந்த வழியாக வந்த ஒரு வாகனம் அவர் மீது மோதி படுகாயம் அடைந்தார். இதைப்பார்த்த போலீஸ்காரர்கள் இருவரும் அங்கிருந்து தப்பி விட்டனர். தர்மபுரி டவுன் போலீசார் சம்பவ இடத்திற்கு சென்று விபத்தில் சிக்கிய தனலட்சுமியை மீட்டு தர்மபுரி ஆஸ்பத்திரியில் சேர்த்தனர். கள்ளக்காதலனிடம் இருந்து பெண்ணை கற்பழிக்க முயன்ற போலீசாரை தேடி வருகிறார்கள்.

இளவயதில் தாத்தாவாகிறார் இளைஞர்!

இங்கிலாந்தை சேர்ந்தவர் தலே ரைட். இவர் தனது 14 வயதிலேயே ஒரு குழந்தைக்கு தந்தை ஆனார். இதைத் தொடர்ந்து இங்கிலாந்திலேயே மிக குறைந்த வயதில் தந்தை ஆனார் என்ற பெருமையை பெற்றார்.
தற்போது இவருக்கு 29 வயது ஆகிறது. இவரது 14 வயது மகள் 15 வயது காதலன் மூலம் கர்ப்பமாகி உள்ளாள். இருவரும் ஒரே பள்ளியில் படித்து வருகின்றனர்.
அவளுக்கு வருகிற ஆகஸ்டு மாதம் குழந்தை பிறக்க உள்ளது. இதைத் தொடர்ந்து 29 வயதிலேயே அதாவது மிகக் குறைந்த வயதில் தாத்தா ஆகும் பெருமையை அவர் பெற்றுள்ளார். படிக்கும் போதே தனது மகள் கர்ப்பம் அடைந்ததை எண்ணி அவர் வருத்தப்படவில்லை. மாறாக சந்தோஷப்படுகிறார்.
இளம் வயதிலேயே பெற்றோராக இருப்பதில் உள்ள சிரமத்தை நான் அறிவேன். அதை நினைத்து தான் சிறிது வருத்தமாக உள்ளது. எங்கள் குடும்பத்துக்கு புதிதாக வர இருக்கும் நபரை நாங்கள் மனப்பூர்வமாக வரவேற்கிறோம். நான் இன்னும் இளைஞன் தான். குழந்தை பிறந்த பிறகு எங்களை போல 6 தலைமுறைகளை கொண்ட குடும்பம் இந்த உலகில் இருப்பது அரிது. இவ்வாறு ரைட் கூறினார்.
அதே நேரத்தில், குழந்தை பெறும் வரை இதே பள்ளியில் தனது காதலருடன் சேர்ந்து படிக்க விரும்புவதாக ரைட்சின் மகள் தெரிவித்து இருக்கிறாள்.

வேற்றுக்கிரக வாசிகள் பூமிக்கு வர வாய்ப்புள்ளதாம்!

வேற்றுக் கிரகவாசிகள் அதாவது ஏலியன்கள் பூமிக்கு வந்து மனிதர்களுடன் சண்டையிடுவது போல், நாம் ஹாலிவுட் திரைப்படங்களில் பார்த்துள்ளோம். அது விரைவில் நிஜமாக வாய்ப்பு உண்டு என்று அமெரிக்க விஞ்ஞானிகள் தெரிவித்த கருத்து பரபரப்பை ஏற்படுத்தியுள்ளது.
அமெரிக்காவின் விண்வெளி அமைதி நடவடிக்கைகள் கமிட்டி சார்பில் "ஏலியன்கள் பூமியை தாக்கினால் என்ன செய்வது" என்பது பற்றி ஆய்வு மேற்கொள்ளப்பட்டு வருகிறது. அப்படி பூமிக்கு வருபவர்கள் வன்முறை வெறியர்களாக இருப்பர் எனவும், இங்குள்ள இயற்கை வளங்களை சுயநலம் காரணமாக சுரண்டுவர் எனவும் அமெரிக்க விஞ்ஞானிகள் தெரிவிக்கின்றனர்.
பூமியை தாண்டியுள்ள கிரகங்களில் ஏலியன் போன்ற உயிரினங்கள் ஏதேனும் இருக்கிறதா என ஆய்வு மேற்கொள்ளப்பட்டுள்ளது. அப்படி ஏலியன் அல்லது பிற உயிரினங்கள் இருந்தால், அவர்களுடன் தொடர்பு கொள்வதற்கான சாத்தியக்கூறுகளையும் அவர்கள் ஆராய்ந்து வருகின்றனர்.
அவ்வாறு ஏலியன்கள் பூமிக்கு வரும்போது, நாம் மேற்கொள்ள வேண்டிய தடுப்பு நடவடிக்கைகள் பற்றியும் அவர்கள் ஆலோசனை நடத்தி வருகின்றனர். பூமிக்கு வரும் ஏலியன்கள் வன்முறையில் ஈடுபட்டால், அவர்களை விண்வெளி அமைதி நடவடிக்கைகளில் ஈடுபடுவதற்காக, அமெரிக்கா சார்பில் தயார் நிலையில் வைக்கப்பட்டுள்ள பிரிவினர் சமாளிப்பர் எனவும் தெரிவித்தனர்.
இதற்காக உலக நாடுகள் அனைத்தும் இந்த விஷயத்தில் அரசியல் மற்றும் ஜாதி மதபேதம் ஏதும் இல்லாமல் ஒருங்கிணைந்து செயல்படுவதோடு, இதற்காக சர்வதேச கண்காணிப்புக் குழு ஒன்றையும் ஏற்படுத்த வேண்டும் எனவும் விஞ்ஞானிகள் கோரிக்கை விடுத்துள்ளனர்.
ஆனால் அமெரிக்க விஞ்ஞானிகளின் இந்த கருத்துக்கு கேம்பிரிட்ஜ் பல்கலை விஞ்ஞானிகள் மறுப்பு தெரிவித்துள்ளனர். இதுகுறித்து பரிணாமவியல் பேராசிரியர் சைமன் கான்வே மோரிஸ் கூறும்போது, "பூமியை தாண்டியுள்ள இந்த பிரபஞ்சத்தில் "ஏலியன்' என குறிப்பிட்ட யாரும் இருக்க வாய்ப்பில்லை. அப்படி மற்ற கிரகங்களில் உயிரினங்கள் இருந்தால், அது டார்வின் கொள்கை அடிப்படையில் தான் தோன்றி வளர்ச்சி பெற்றிருக்க முடியும்.
ஹாலிவுட் படங்களில் வருவது போல், விகாரமான தோற்றங்களில் இருக்க வாய்ப்பில்லை. மேலும், அவர்கள் வன்முறையில் ஈடுபட்டு, பூமியில் உள்ள வளங்களை ஒருபோதும் சுரண்டவும் வாய்ப்பில்லை. ஏலியன் குறித்த அச்சம் தேவையற்றது' என்றார்.

அசினின் உதட்டில் ஏதோ ஒரு மாற்றம்!?

விஜய் ஜோடியாக அசின் நடித்த காவலன் படம் ரிலீசாகி ஓடிக் கொண்டிருக்கிறது. இதில் அசினை பார்த்த ரசிகர்கள் தோற்றத்தில் வித்தியாசம் இருப்பதாக சொல்கிறார்கள். கஜினி, போக்கிரி, எம். குமரன் சன் ஆப் மகாலட்சுமி, ஆழ்வார் போன்ற படங்களில் வந்த அசினுக்கும் காவலன் அசினுக்கும் வித்தியாசம் உள்ளது என்கின்றனர்.
இந்த மாற்றத்துக்கு காரணம் அறுவை சிகிச்சை என்று கூறப்படுகிறது. உதட்டில் பிளாஸ்டிக் அறுவை சிகிச்சை செய்துள்ளார் என்று தகவல் வெளி யாகியுள்ளது. சல்மான்கானுடன் அசின் நடித்த லண்டன் ட்ரீம்ஸ் படப்பிடிப்பு லண்டனில் நடந்த போது சிறிய விபத்தில் சிக்கினார் என்றும் இதில் அசின் உதடு கிழிந்து தொங்கியது என்றும் மும்பை பட உலகம் கிசுகிசுக்கிறது.
காவலன் படப்பிடிப்பு துவங்கிய போது உதட்டுக்கு அவர் பிளாஸ்டிக் அறுவை சிகிச்சை செய்து கொண்டாராம். இது பற்றி அசின் தரப்பில் கேட்ட போது மறுத்தனர். லண்டன் ட்ரீம்ஸ் படத்தில் வேலை செய்து இரு வருடங்கள் ஆகிவிட்டது.
இத்தனை நாளைக்கு பிறகு அசின் விபத்தில் சிக்கினார் என்றும் உதட்டில் அறுவை சிகிச்சை செய்து கொண்டார் என்றும் செய்திகள் பரப்புவது உள்நோக்கமானது என்று அவர்கள் அதிருப்தி வெளியிட்டனர்.
பிளாஷ்டிக் சர்ஜரி நடந்ததாக வெளியான தகவல்கள் புரளிதான் என்றும் கூறினர். அசின் “இமேஜை” சிதைப்பதற்காகவே இந்த புரளி கிளப்பப்பட்டு உள்ளது என்றும் அவர்கள் தெரிவித்தனர்.

விபச்சார விடுதி நடத்தியதாக பெண் கைது!

சென்னை தியாகராயநகரில் மசாஜ் கிளப்பில் விபசாரம் செய்ததாக அந்த கிளப்பின் பெண் அதிபர் கைது செய்யப்பட்டார். அங்கு விபசாரத்தில் ஈடுபடுத்தப்பட்ட 3 அழகிகள் மீட்கப்பட்டனர்.
சென்னை தியாகராயநகர் சாரங்கபாணி தெருவில் கடந்த டிசம்பர் மாதம் புதிதாக மசாஜ் கிளப் ஒன்று திறக்கப்பட்டது. அந்த கிளப்பில் மசாஜ் செய்ய செல்லும் வாலிபர்களிடம் அழகிகள் உல்லாசத்தில் ஈடுபடுவதாக போலீசாருக்கு புகார்கள் வந்தன.
துணை கமிஷனர் சண்முகவேல் உத்தரவின் பேரில், உதவி கமிஷனர் மனோகரன் மேற்பார்வையில் சப் இன்ஸ்பெக்டர் மனோகரன் போலீஸ் படையுடன் சென்று அந்த கிளப்பில் அதிரடி சோதனை மேற்கொண்டார்.
சோதனையின்போது அங்கு விபசாரத்தில் ஈடுபட்டதாக 3 அழகிகளை போலீசார் மீட்டனர். மசாஜ் செய்வதற்கு ரூ.2,100ம், உல்லாசம் அனுபவிப்பதற்கு தனியாக இரண்டாயிரம் ரூபாயும் போலீசார் அனுப்பிய ஒருவரிடம் கிளப் உரிமையாளர் வசூலித்துள்ளதாக தெரிகிறது.
இதன்பேரில் உரிமையாளர் சாந்தி (வயது 24) என்பவரை போலீசார் கைது செய்தனர். பெரம்பூரைச் சேர்ந்த இவர், கணவர் தன்னை விட்டு பிரிந்து சென்றுவிட்டதால், இந்த மசாஜ் கிளப்பை தொடங்கியதாக போலீஸ் விசாரணையில் தெரிவித்துள்ளார்.

ஆயுளை 10 வருடங்கள்வரை அதிகரிக்கும் மருந்துவில்லை!

மனித ஆயுளை சுமார் 10 ஆண்டுகள் வரை நீடிக்கக்கூடிய மருந்துவில்லையைக் கண்டுபிடித்துள்ளதாக அமெரிக்காவின் ஹாவர்ட் மருத்துவ கல்லூரி ஆராய்சியாளர்கள் தெரிவிக்கின்றனர்.
இன்னும் ஆய்வு நிலையில் உள்ள இந்த மருந்து விரைவில் விற்பனைக்கு வரவுள்ளது.
முதுமையைத் தடுத்து மனிதனின் ஆயுளை நீடிப்பதற்கான வழிமுறைகள் பற்றி அமெரிக்காவின் ஹாவர்ட் மருத்துவ கல்லூரி ஆய்வாளர்கள் ஆய்வு ஒன்றை நடத்தி வருகின்றனர்.
' செர்டுயின் ' என்ற ஜீனே முதுமையை கட்டுப்படுத்துகின்றது. இதனைத் தூண்டும் மருந்தினையே ஆராய்ச்சியாளர்கள் தற்போது உருவாக்கியுள்ளனர்.
ஒரு மாத்திரையை உட்கொள்ளும் போது, வயதானாலும் நினைவாற்றல் குறையாது, உடல் உறுப்புகள் தளராது, மாரடைப்பு ஏற்படாது என ஆய்வில் தெரிவிக்கப்படுகின்றது.
விலங்குகள் மற்றும் மனிதர்களிடமும் இந்த மருந்து பரிசோதிக்கப்பட்டுள்ளதுடன், இதுவரை எந்த பக்கவிளைவுகளையும் இது ஏற்படுத்தவில்லை.
ஆனால் ஆயுளை மேலும், மேலும் நீடிக்க இதைத் தொடர்ந்து சாப்பிட்டால் பின்விளைவுகள் ஏற்படலாம் என ஆராய்ச்சியாளர்கள் தெரிவிக்கின்றனர்.